Хакас тiлiн хайраллир паза тилiдер «Ине тiлi» региондағы халых пiрiгiзi 04.10.2018 чылда юридическай саринаӊ санға алылған. «Ине тiлiнiӊ» учредительлерi – З.А. Чертыкова, Т.Г. Боргоякова, Н.С. Майнагашева, Ю.П. Челтыгмашев. Устағҷызы – Н.С. Майнагашева.
«Ине тiлi» позыныӊ тоғызын 2003 чылда халых чӧрiмi чiли пастаан. Координаторы – З.А. Чертыкова. Тӧстелгеннеӊ сығара халых чӧрiмi хакас тiлiн тилiдерiне хайығ салған. Иӊ не пастап ол хормачы иирлер, хакас сӧбiрелер аразында ыр-сарын паза кибiрлер тутчатханнары хоостыра кӧзiдiг- марығлар (2007), тоғынчатхан улус аразында «Ине тiлi – чонныӊ худы» (2011), пастағы хакас ученай Н.Ф. Катановтыӊ чуртас паза чайаачы чолына, аныӊ 150 чазын таныхтап, чарыдылған марығ (2012) иртiрiп, хакас тiлiне хайығ айландырған. 2013 чылда грант хоостыра «Чон кӧглерi» ансамбльнаӊ хада аалларҷа чӧрiп, тахпах хоостыра «Тахпах чорығы» мастер-класстар иртiрген. 2014 чылдаӊ сығара чыл сай ӱгренҷiлер аразында иртчеткен «Ине тiлi» фестивальны республикадағы Национальнай паза территориальнай политика, Ӱгредiг паза наука министерстволарынаӊ паза Культура министерствозынаӊ хада иртiрче. Iди 2014 чылда фестиваль «Ат полары –хулуннаӊ, ир полары – кiчiгдеӊ» тема хоостыра ирткен. «Ине тiлi – Алыптығ нымах» фестиваль-марығ ӱс чыл (2016, 2017, 2018) иртiрiлген. Полған на сай «Ине тiлi» марығ араласчыларына, алынҷа кинде тимнеп, сыйлапча. Iди хакас чонныӊ тiлiнiӊ пайиина, пазылбин пӱткен чайаачызына хайығ салып, «Айдолай» паза «Албынҷы» алыптығ нымахтарны ӧнетiн чарыхха сығарып, ӱгренҷiлерге читiрген.
Хакас тiлiн хайраллир паза тилiдер «Ине тiлi» региондағы халых пiрiгiзiнiӊ Уставы хоостыра итчеткен киректерiнiӊ ӧӧн пӧгiнi – хакас тiлiн паза хакас чонныӊ культуразын хайраллиры паза тилiдерi, аны чон аразында алғыдары.
Bir cavab yazın